பிரபலமான யூடியூபர் எருமசாணி விஜய் இயக்கத்தில் அருள்நிதி, அவந்திகா மிஸ்ரா ஆகியோர் நடிப்பில் வெளியாகி இருக்கும் படம் டி பிளாக்.
அடர்ந்த காட்டுக்கு அருகே இருக்கும் ஒரு கல்லூரியின் பெண்கள் விடுதியில் நடக்கும் கொலைகள் அக்கல்லூரியை உலுக்குகின்றது. இந்த சம்பவங்களின் பின்னணியில் இருப்பது யார்? என்பதுதான் படத்தின் கதை.
இப்படத்தின் மிகப்பெரிய பலம் நட்சத்திர தேர்வு. இப்படத்தை இயக்கி இருக்கும் விஜய் ஒரு முக்கிய பாத்திரத்தில் நடித்தும் உள்ளார். ஹீரோ அருள்நிதி, முக்கிய பாத்திரங்களில் நடித்திருக்கும் கரு பழனியப்பன், உமா ரியாஸ் என அனைவரும் தங்கள் பாத்திரத்தை உணர்ந்து நடித்திருக்கிறார்கள்.
ரான் யோகன் இசையில் பாடல் நன்றாக இருக்கிறது. பின்னணி இசையில் ரசிகர்களை அலறவிட்டிருக்கிறார் கௌசிக். படத்தின் தன்மையை உணர்ந்து மிகச்சிறப்பாக பணியாற்றி இருக்கிறார் ஒளிப்பதிவாளர் அரவிந்த் சின்ஹா.
கல்லூரி மாணவர்களின் கலாட்டா காமெடிகள் நம்முடைய கல்லூரி காலங்களை நினைவுபடுத்துவதைப்போல் இருப்பது, விடுதியில் நடக்கும் ஹாரர் பகுதிகள் முதுகுத்தண்டை சில்லிட வைப்பது என எல்லா வகையிலும் படம் நம்மை ஒன்றிப்போகச்செய்கிறது.
