குட்நைட் திரை விமர்சனம்

புதுமுக இயக்குநர் விநாயக் சந்திரசேகரன் இயக்கத்தில் மணிகண்டன், ரமேஷ் திலக்,, மீரா ரகுநாத், ரேச்செல் ரெபெக்கா ஆகியோர் நடிப்பில் வெளியாகி இருக்கும் படம் குட்நைட். ஷான் ரோல்டன் இசையமைத்திருக்கும் இப்படத்தை மில்லியன் டாலர் ஸ்டூடியோஸ் மற்றும் எம்.ஆர்.பி எண்டர்டெயின்மெண்ட் நிறுவனங்கள் இணைந்து தயாரித்துள்ளன.

தமிழ் திரையுலகில் பல்வேறு ஃபீல் குட் படங்கள், குடும்ப படங்கள் வந்திருக்கின்றன. ஆனால் அப்படங்களில் இல்லாத ஒரு சிறப்பு, மாமன், மைத்துனன் இடையேயான எதார்த்தமான நட்பு அதற்காகவே அறிமுக இயக்குனர் விநாயக் அவர்களுக்கு சிறப்பு பாராட்டுக்கள்.

ஐடி நிறுவனத்தில் பணியாற்றும் நடுத்தர குடும்பத்தை சேர்ந்த மணிகண்டனுக்கு ஒரு பிரச்சினை, அது என்னவென்றால் ஐந்து நிமிடம் அமைதியாக அமர்ந்திருந்தால் தூக்கம் வந்துவிடும், அதைவிட பெரிய பிரச்சினை அந்த ஏரியாவே அலறும்படியாக ஹை டெசிபளில் குறட்டைவிடுவார். இதனால் பல்வேறு பிரச்சினைகளை சந்திக்கும் அவருக்கும் திருமண வாழ்க்கையிலும் பிரச்சினை வருகிறது. அதை எப்படி சமாளித்தார் என்பதே குட்நைட் படத்தின் கதை.

படத்தின் மிகப்பெரிய பலம் நடிகர்கள் மணிகண்டன், ரமேஷ் திலக், ரேச்சல், அனு, பாலாஜி சக்திவேல் என அனைவரும், திரைக் கதாபாத்திரங்களாக தோன்றாமல் நம் கண்முன்னே நடமாடும் சக மனிதர்களாக தோன்றும் அளவுக்கு சிறப்பாக நடித்திருப்பதுதான். பாராட்டவேண்டுமென்றால் அனைவரையும் தனித்தனியாக பக்கம் பக்கமாக பாராட்ட வேண்டும். ஃபீல் குட் மூவிக்கு தேவையான மிகச்சிறப்பான கச்சிதமான பாடல்களையும் பின்னணி இசையையும் வழங்கியுள்ளார் ஷான் ரோல்டன். கவிஞர் மோகன் ராஜனின் பாடல் வரிகள் சிறப்பு. படத்தொகுப்பு, ஒளிப்பதிவு என அனைத்து டெக்னிக்கல் விசயங்களும் உறுத்தாமல், படத்துடன் இணைந்து பயணிக்கிறது. குடும்பத்துடன் பார்த்து கொண்டாட வேண்டிய படமாக வெளியாகியுள்ளது குட்நைட்

குட்நைட் : ஃபீல் குட்